當年今日
關於我們

【短片】【被指一腳踏兩船】素顏楊秀惠撐枱腳箍實富貴男友葉樹培

蘋果日報 2016/01/31 06:00

楊秀惠送外賣楊政龍人肉速遞葉樹培

現年31歲嘅楊秀惠早前傳一腳踏兩船,背住富貴男友葉樹培同楊受成細仔楊政龍搞暖昧,被指趁拍劇放飯空檔,由電視城揸車去淺水灣做埋「人肉速遞」,同楊政龍短聚兩粒鐘。

不過秀惠嘅緋聞似乎無損佢同男友之間感情,噚晚接近八點,記者發現素顏嘅秀惠同葉樹培戴住一黑一白嘅cap帽,一齊喺中環歌賦街一間拉麵店食晚飯。埋單後,秀惠先步出店外,同尾隨男友保持數個身位距離。呢pair情侶雖然好避忌,但默契十足,負責揸車嘅秀惠用搖控開車門,男友就自動自覺行去乘客位。

開車冇耐,秀惠發現有記者,先喺中半山兜圈,之後行西隧過九龍。私家車駛到長沙灣時,記者落車影相,葉樹培非常怕醜,將cap帽拉低到見唔到樣,秀惠試圖較低車窗叫記者唔好影,露出尷尬笑容。見撇甩記者失敗,佢哋最後決定直駛返地利根德閣寓所。據聞葉樹培一向出手闊綽,秀惠現居嘅地利根德閣都係由男友俾錢租住,仲有打本俾女友開美容店當投資,傳聞男友去年曾向秀惠求婚,但秀惠又想mark實「筍盤」楊政龍,先遲遲未答應。