人大釋法來勢洶洶,曾麟詩三人組成嘅「政制發展諮詢小組」,一早經已架空,立法會話要傳召阿董嚟解畫。解畫又有乜用?現時成個特區政府,講到政制發展呢一層,中央人民政府,左一句「啟動權在中央」,右一句「解釋權在人大」,全廢武功。
希望幻滅惱羞成怒
現時特區根本係個爛局,連好多親中愛國分子都唔知中央人民政府想搞邊科。想保董?梗唔係。想保住九月立法會半數議席?民建聯轉軚個樣咁核突,中方愈強硬,民建聯愈叫苦,點樣保?想嚇窒香港人唔好投票畀民主派?投票係不記名,呢樣就更天真。中央人民政府咁樣大石砸死蟹,若果只係想強奪三兩個功能團體議席,確保立法會唔「淪陷」,將中國政府簽署過的《中英聯合聲明》等協議嘅誠信(若然重有任何剩落),將胡溫「以民為本,執政為民」嘅面子,一鋪過重鎚押晒落去,賺同蝕,制唔制得過,儍嘅都計算得出。
不過現時係非常時期,完全冇常理好講。釣魚台呢鋪,放任「民間保釣」組織挑釁完一回合,跟住又唔准保釣船再出海,究竟想搞邊科,連㗎仔都𢱑爆頭。外交界流傳,因為中央人民政府最近放咗支火箭,楊利偉做完英雄,日本見到,對中國經已躋身發達富裕國家行列,感到十分欽佩,為免阻住中國人民自求多福及顧全其自尊心,日本好心提出削減經援貸款,以免俾全世界誤會,以為中國向日本乞食,並且言出必行,最新呢一期經援,即時減款兩成。點知一番好意,遭到對方曲解,估唔到因為咁,有人就刺激到發啷厲,即時反枱,為顯顏色,就揀咗釣魚台做一個發洩位嘞。