日本尊尼組合KAT-TUN前成員田口淳之介，今晚假九展舉行首次香港見面會，佢甫抵埗即接受本地傳媒訪問。

32歲嘅田口淳之介脫離尊尼事務所作獨立發展，佢曾經參演《Legal High》（律政狂人）、《今天不上班》等人氣日劇，單飛後加盟環球唱片目前專注歌唱事業，田口表示今後會繼續演戲，希望在演員生涯上有更多代表作。問到今年嘅發展目標，田口表示：「噚日完成巡演尾站，之後開始要投入創作新歌，亦會以全面性作藝能發展，包括模特兒工作。」更希望作多方面挑戰，今年都想多啲亮相綜藝節目。

今次相隔多年再來香港，田口自言早在日本時已好期待可以見到一直等自己嘅fans，而比起以前係組合成員，如今一個人要在舞台上顧及整體演出，係個人發展後最唔同嘅地方。

田口已第三次到香港，佢大嘆每次都冇時間觀光，佢希望日後可以私下來港旅行，想去周圍影相，今次到香港想食撈麵，又問記者有乜手信介紹，當得知助手為佢買咗川貝枇杷膏即笑言要當手信買返日本，又稱開完騷想用來滋潤喉嚨。對於在台灣騷上講錯廣東話，田口承認的確好容易把普通話與廣東話撈亂，剛剛才分清「你好」、「大家好」嘅兩者發音，佢話：「我會好好記熟，希望不會在見面會上搞錯。」佢仲話好緊張，唔想會時用廣東話講錯自己個名。

田口擁有180cm身高，被問到自己最吸引fans嘅地方時，佢笑言：「樣貌？」跟住佢就話只係講笑，田口話好感激家人生得佢咁高，穿衣服容易得多，令佢好感恩。田口坦言唔太認識大中華區藝人，比較熟悉係成龍，都想有機會參演動作片，自己以前有學劍道，加信又有運動細胞，相信都應付得來。

目前田口身兼自己公司嘅社長一職，佢閒時會遊車河、浸溫泉來舒緩一下，雖然唔會去健身中心做gym，但每日都會抽時間練腹肌或跑步。

精選娛聞，喺晒《娛果》
http://fb.com/appledailyent