【本報訊】武漢肺炎全球流行，股市大跌，市民普遍看淡本地樓價走勢，不過仍有市民認為可以趁低吸納。

陳先生表示，疫情影響全港經濟，例如零售業、餐飲業等，這類行業中亦有業主正在供樓，這批人斷供就會造成骨牌效應，全線大冧市，他預計今年樓價大跌20%。對於會否趁低入市，他笑言，「自己冇物業喺手，梗係想趁低吸納一啲，目標大約800萬至1,000萬元，但現在仲未係時機，出面太亂。」現時投資的話，他認為第一還是樓市，其次是保險，「若果你買唔到樓，又不是專業投資者，投資牛熊證風險極大，藍籌股收息穩定，但有機會蝕價，所以剩返保險可以維持高息回報，而且風險可以分散畀保險公司，好過日日對住1,000點上落的股市。」

樓市料續向下

全球股價大冧，吳先生表示，樓市有機會延續股市頹勢，價格繼續向下。他解釋，始終肺炎全球散佈，外國開始封關，貿易生意做不了，經濟一定衰退，過多段時間，本港經濟又再依賴中國托市，但現時中國自己都顧不住，哪有時間管理香港，所以本港樓價大機會下跌。他續指，「現在唔使理樓價跌幾多，買咗都係跌落去，不如買黃金、美金、日圓，穩陣啲！」