莊思明(Lisa)喺去年5月被爆出與楊明蹺晒手返屋企過二人世界，事後楊明大方認愛，承認因為拍《愛．回家》而撻著，仲大讚女友係好女仔，Lisa亦都直認同楊明熱戀中，成為大台公開嘅一對。而佢哋嘅感情真係一日千里，認愛冇耐已有經有報道話楊明去咗大馬見女友家長！（新聞連結：
http://bit.ly/2wkPR8I ）

而36歲嘅楊明自從同Lisa拍拖之後，成個人又真係生性咗好多，工作量亦不斷增加，事業有起色，真係愛情事業兩得意，楊明仲公開承認鎖定對方為結婚對象，佢仲話希望喺1、2年內向女友求婚！(新聞連結： http://bit.ly/2x8sy2v )

話晒楊明係上位中嘅小生，有時忙起上嚟又真係好難有時間見面，咁點算好？其實女友都畀晒貼士，Lisa曾經接受訪問講過，如果搵到合適嘅地方，唔介意同男友同居：「始終大家工作飛來飛去，返到嚟可以見面。不過幾時會同居就冇專登諗。」

口裏話冇專登諗，身體卻很誠實，日前有《蘋果》讀者報料，喺相思灣附近嘅村屋見到佢哋兩個拍住拖咁睇樓，讀者話：「嗰日大約係4點幾，楊明揸住架車，車住女友同埋一個女人去咗相思灣，跟住佢哋去咗一幢白色嘅村屋，冇耐見到楊明同莊思明喺天台出現，佢哋並排企喺度望住個海灘，個樣好似好滿意！之後又落咗去3樓行咗個圈，過咗冇耐就離開，手拖手咁上車走人！」

Lisa同楊明拍拖年幾就已經不時一齊出席活動又喺社交網晒幸運，今次仲搵埋地方築愛巢，唔通佢哋就快好事近？