當年今日
關於我們

【李八方online】年過半百扮女孩 政協大媽高八度演說浮誇造作笑死人

蘋果日報 2019/03/12 13:18

政協全國兩會大灣區凌友詩

提起講嘢時表現造作,大家可能即刻諗起「好假的肥仔」,但其實喺噚日悶到hihi嘅全國政協會議都有同類「奇人」出現,佢就係壓軸出場,被在場政協同中共高官掌聲「打斷」發言13次、自稱「平凡的台灣女孩」嘅台籍港區全國政協委員凌友詩。
凌友詩會上講咗乜嘢,搞到台下一班政協咁high呢?原來就係不斷針對台獨問題,強調「祖國也必然統一」,話全中國唯一合法政府就係中共政府。據中共喉舌《大公報》描述,佢噚日發言時不時「深情遠眺」,現場政協隔幾十秒就拍手,「為祖國必然統一點讚」,但就無提凌友詩最惹人矚目、成為網民熱烈討論嘅原因,其實係佢極度浮誇造作嘅高八度演說方式。
唔少網友都對呢位年約57歲,但仍自稱「女孩」嘅政協唔太受落,有網民話點睇佢都只係一個「大媽」,熟悉內地情況嘅資深傳媒人潘小濤亦留言話「真係睇到人打冷震!」
唔少台灣網友更喺討論區質疑佢係「假台灣人」,「這個傢伙的台灣國籍有沒有被取消? 」網友更形容「中共造假又一最新力作,你我都被代表了」 。
其實呢位「好假的政協」來頭唔小,根據內地傳媒報道,佢喺1962年出生於台灣高雄,老豆係中國國民黨海軍新高艦副艦長,曾經參加1958年金門炮戰。凌友詩16歲隨父舉家移居至香港,其後喺珠海中學就讀,再考入香港中大,完成中文系本科同碩士課程後,轉到政治與公共行政學系讀第二個碩士。
到咗2003年,凌友詩攞到香港大學政治哲學博士學位,同年出任內地福建省政協,2005年就進入咗特區政府,喺現時已被特首林鄭月娥解散嘅中央政策組做高級研究主任,一做就做咗8年,離任後亦就唔少社會議題發表過極左言論,包括建議人大釋法杜絕立法會拉布、「激活」現有法例處理叛國行為,以及退休警司朱經緯不應被帶上法庭等等。
唔知係咪中共覺得言論實在好啱聽,凌友詩去年3月首度獲委任港區政協委員,一上任嘅建議包括叫中央喺香港同大灣區之間整個「中途島」,作為香港「深度融入」大灣區跳板,同時建議中共要喺香港行使「中央指令權」,要求香港學童接受免費教育時,直接使用中國教育部統編嘅教材。唔知大家,有冇被呢位大媽嚇怕?
-------------------------
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
-------------------------
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef