【本報訊】興德校長陳章萍備受質疑。曾在該校任教的鄭老師（化名）向《蘋果》透露，陳曾挑釁一名亞氏保加症學生，「（該學生）最唔鍾意人叫佢花名『豬仔』，陳校長喺早會借題發揮，話改花名行為唔啱，然後指名道姓講：好似某班嘅某某某咁，佢唔係豬仔，大家千祈唔准叫佢豬仔呀」，導致該學生情緒失控。
鄭老師解釋，他因質疑陳的管治手法而遭「報復」，陳挑釁的上述患病學生屬鄭的班別，旨在破壞當日鄭的課堂評核表現。該學生被挑釁後當場崩潰嚎哭，鄭花了10多分鐘安撫，在課堂評核時已平復。不過陳在評核時又借故挑剔，鄭憶述：「我教個（患病）學生唔好喊、打人鬧人，而係喺紙上面寫字、畫畫宣洩，但（陳）就話我唔制止學生，搞到畫滿哂成張工作紙，最後評核都係畀我好低分」。

疑公報私仇調低操行分

本報也獲悉，一個鄭姓家長今年2月座談會公開批評陳後，陳要求負責老師調低該子女的操行分，後來估計陳因怕被揭發，要求改回原有分數。本報取得一段疑似陳與負責老師的對話錄音，陳要求重新核對學生操行，「尤其是阿鄭XX，既然佢咁麻煩，對一對佢操行」。該教師則指「校長，我上次咪畀咗你睇嘅，XX都轉達咗你意見，我都修改咗喇」，陳則指：「唔好修改喇，你畀原裝嗰個佢算啦，費事佢又話我㩒低佢，我𠵱家吩咐你」。
據悉另與陳章萍交惡的家長女兒的成績表上，操行分一欄則沒有任何評分，只顯示「---」字樣，擔心會影響升學。本報昨向興德查詢，截稿前未獲回覆。
■記者周　婷、梁御和