近年嚟手機遊戲開始越嚟越普及，仲已經由Candy Crush進化到玩乜都有，而當中熱門嘅就有以五打五對決為主嘅《傳說對決》，仲紅到連衛詩雅洪卓立都會搵埋fans一齊玩。

不過，今次點都唔夠台灣天團五月天嘅主唱阿信玩到咁大，話說五月天呢排做緊巡迴演唱會，喺噚晚就去到天津表演，而五月天嘅主唱阿信就喺演唱會準備當中拎咗場地背景嘅大銀幕嚟玩《傳說對決》，今日佢將呢件事貼上社交平台，仲寫道：「有人打傳說螢幕比我們還大嗎？」

五月天早前亦被邀請為呢款遊戲創作主題曲，熱愛遊戲嘅阿信留言寫道：「打遊戲打到寫主題曲，也是有點勵志啊。」，玩到咁大，fans見到緊係瘋狂留言，而阿信亦好有心回覆，仲搞笑謂：「技能鈕比人還高。」當中名fans表示：「這樣我實在很難約束學生玩傳說對決了…」而阿信就幫佢出面警告學生：「週末才能團一波，別讓老師不開心。」fans同偶像嘅互動令人睇落都覺得好玩。

精選娛聞，喺晒《娛果》
http://fb.com/appledailyent