香港樂壇每年都有新人出道，或際遇或造化，唔少藝人都好似流星咁，匆匆閃過不留痕。最近，憑選秀節目《全民造星》冒起嘅12人組合MIRROR，有ViuTV做強大後盾，機會接踵而來，甫出道已經開音樂會，終於踏上藝人之路，深明得來不易嘅MIRROR坦言好奇妙、好幸福。

11月出道、12月21號就喺九展舉行首個音樂會嘅MIRROR，日前就喺《全民造星》靈魂人物花姐嘅陪同下接受《蘋果》專訪。MIRROR由隊長楊樂文（Lokman）、姜濤、李駿傑（Jeremy）、江熚生（Anson Kong）、陳卓賢（Ian）、盧瀚霆（Anson Lo）、柳應廷（Jer）、陳瑞輝（Frankie）、邱士縉（Stanley）、呂爵安（Edan）、邱傲然（Tiger）同王智德（Alton）組成。喺《全民造星》之前，佢哋只係平凡如你我，半年後，佢哋就將要擁有自己嘅音樂會。Stanley話：「感覺真係好奇妙，冇諗過可以對住咁多人唱歌，好似入咗夢裡面咁，好多fantasy喺入面。」Jer笑言以前喺街頭busking都冇人，冇諗過可以喺咁多觀眾面前表演舞技：「其實唔係好習慣做藝人，o依家出街，有啲女學生見到我，會怕怕醜醜埋嚟搵我集郵，好似小fans咁，個感覺係爽嘅，以前busking都冇人睇，得我自己，o依家有人focus嘅感覺好唔同。」

Tiger就話自己半年前仲係學生，冇諗過咁快加入男團有咁多機會：「好幸福，不過面對傳媒係有啲難，要學習下。」身旁嘅Anson Kong即刻大讚Tiger主動咗：「佢o依家會想講嘢多咗。」

Stanley感恩多咗人識，但係又會疑惑：「試過喺街有人同我打招呼，我諗緊係好耐冇見嘅朋友，定係喺電視識我嘅人？其實做到藝人係好興奮嘅，但我覺得自己都做咗人哋嘅學習對象，要做個榜樣，留意自己有懶音、上網會睇自己有冇打錯字、標點符號，因為真係會有人留意。」Ian都覺得因為多咗人認識，壓力會大咗：「唔想自己犯錯，不過都唔會好辛苦，只係仲適應緊。」

Anson Lo認同出街會更加注重自己嘅言行舉止：「會小心咗同留意咗，因為我哋o依家做每樣嘢都會影響好多人。試過出街有人偷影、偷望，最勁係媽咪去買嘢，有人會問係咪我媽咪，我覺得『嘩，咁勁，咁都認得？』」人氣王姜濤反而有啲淡然，佢話：「其實冇咩唔適應，因為有人留意係好事，要學習用另一個心態去面對。」

至於佢哋私下嘅生活，又有咩唔同咗？有穩定女友嘅Lokman話：「係少咗時間見，不過都冇咩避忌，女友都叫我加油，佢好體諒。我最近拍緊《狂舞派3》，佢都問我好多次有冇拖手、錫錫，仲有嚟探班。」佢哋仲話花姐都冇唔畀拍拖，所以都唔介意公開戀情。

至於12月舉行嘅音樂會，MIRROR每人將有solo部分，問到佢哋想做咩？隊長Lokman希望可以有長少少時間去炒熱氣氛，擅長跳舞嘅佢話要挑戰唱歌。Ian想試下rap：「我外表斯文都可以rap㗎，或者到時着住西裝rap。」Tiger就話好想同張國榮、米高積遜（Michael Jackson）隔空合作：「如果畀我天馬行空咁諗，真係好想可以同佢哋一齊演出，佢哋好獨特，真係好想模仿佢哋。」

Anson Kong同Alton就不約而同想搵郭富城合作，佢哋話：「阿城真係好勁，跳兩個幾鐘都冇問題，真係好難㗎，佢係我哋追求嘅目標。」Alton仲話如果可以好似阿城咁感染到身邊嘅人就好：「尋求無悔真生活，呢句歌詞真係感染到我，如果可以感染到身邊嘅人，其實係一件幾浪漫嘅事。」

採訪：盧妹
攝影：陳慧安
拍片：馮嘉銘
化妝：Annie G Chan Makeup Centre
髮型：Stone Of PRIVATE I
場地提供：Joyland 聚友坊

精選娛聞，喺晒《娛果》
http://fb.com/appledailyent