眾所周知，97歲賭王何鴻燊家族龐大，四房已共17個子女。二太太藍瓊纓的二房子女人才輩出，主掌何家生意命脈，私下，五姐弟關係密切，感情亦非常好。何超鳳細數姐妹情，「我哋幾姐妹真係好close，大家唔駛講多幾句，心裡面已經知，已經明。計樣，我就最似爹哋，和Lawrence都好似樣。」

大家姐何超瓊(Pansy)：
「細個時，佢的確係話晒事。因為爹哋以前成日要出去做嘢，媽咪就跟住啦，咁爹哋媽咪就一定會話：有咩就聽家姐話。大家姐好關心我哋，又好為我哋諗，其實佢的角色好難做，佢只係大我兩年幾，但要比我成熟。記得，我去美國讀中學時，佢比媽咪對我要求更加高，佢會幫我揀科，『我已經幫你揀晒科，你呢年讀呢啲、呢啲，嗰年讀嗰啲、嗰啲。』大家姐有威嚴，為我好，想幫我鋪一條好的路。」入公司後，和霸氣大家姐一齊工作，磨擦早就變成默契，「我哋並肩作戰好多年，佢o依家唔會話一定要話晒事。細個就會鬥氣，大咗，嘈一兩句就冇嘢，我哋好少嘈交，有時面左左，都係好短時間。」

三妹何超蕸（Maisy)：
「我哋響美國讀大學時，一齊響羅省住咗兩年，大家近啲，互相照顧，有好多共同朋友，大家一齊出嚟蒲，成日一齊煮飯，好多呢啲細節，變咗o依家，好多嘢都同Maisy係啱key啲。」

四妹何超儀（Josie）:
「佢每一套戲我都有睇，佢由細到大都獨特、自我啲，咁同佢同我哋年紀隔咗一段都好有關係啦。我、Pansy、Maisy有一段時間一齊響美國讀書，變咗Josie呢，就有少少小霸王，爹哋好錫佢，佢氹得爹哋好開心。對我嚟講，Josie係好有自我思想，又係好捱得的人。大家可能有誤會，佢係千金小姐喎，但佢比好多人都捱得，為咗自己理想，真係肯去搏、去做，呢樣我真係好尊重佢，你問我，我都未必得。好似，有一次佢話佢去拍電視劇，我話『你去拍劇，好喎。』佢話：『係呀，我個shot，係講咗六次『好嘢！好嘢！好嘢！』不過我係六點鐘就響度等，『唔容易呀！』我話，『你唔覺得慘？』佢話：『做嘢就係咁㗎啦。』」

五弟何猷龍（Lawrence）:
「我哋屋企移民咗去多倫多時，嗰兩三年接觸最多。佢嗰時細細個，我哋出街會帶埋佢，佢係好乖的細路仔。o依家大咗，你都睇到，佢係一個好好的細路，好後生、好勤力、好用心做事，好錫屋企，好錫自己個女，落手落腳照顧。有一個咁的細佬，我係好驕傲。」

何家靚女多，近年曝光率最高、公認索女的三房何超蓮，賭王眼中「靚到不得了」的四房超欣，超鳳眼中，最靚女又是哪一位？「大家姐梗係最靚啦！不單止係靚，係最靚，佢響唔同歲數，都有唔同的一面，唔係個個人可以成世人都咁，仲要佢係唔係好鍾意打扮的人，唔打扮都咁靚，而家都仲咁靚！」

採訪：林妙萍
攝影：郭賢興
攝錄：林德雄、周樂恒

精選娛聞，喺晒《娛果》
http://fb.com/appledailyent