容祖兒男友劉浩龍（師兄）因為日前在facebook發表「污糟的手」言論遭全城鬧爆，雖然師兄已經漏夜刪除留言及道歉，但依然未能滅火，更連累祖兒遭網民勁插，彈她揀男友欠缺眼光，又認為她應該盡早提出分手。祖兒昨日與李克勤身穿校服，以學生造型在柴灣拍攝合唱新歌《世界真細小》的MV，雖然她直認師兄行為鹵莽，不過亦不難發現她對男友袒護之情。
祖兒聲稱男友為錯失而自責，她說：「佢呢幾日好自責，詞不達意造成誤會，呢個唔係小事，為咗一個錯失令大家唔舒服而對佢有咁嘅評論，我都戥佢唔舒服。經一事長一智，畀佢一個教訓。」愛之深責之切的她更公開為男友求情，祖兒說：「係鹵莽嘅，我有同佢分析過公眾人物講嘢要負責任，喺錯誤中學習，希望大家盡快原諒佢。」

做女友有壓力

師兄初時以「有潔癖」作辯解，問到祖兒兩人拍拖會否特別費神？她謂：「對我會造成幾大壓力，我好『呢啡』，但我都會洗手。」
而克勤談到祖兒躺着中槍一事，他笑說：「做身邊人唔多唔少都會沾濕，在所難免，共度患難先見真情。」
此外，容祖兒昨日在Instagram上載一張蔡卓妍（阿Sa）的照片，並留言：「香港地真係好易撞到明星㗎！」她在結束拍攝工作坐車離開時，在路上巧遇阿Sa，當時阿Sa坐着助手開的車，和祖兒的車擦身而過，祖兒還及時拍下了阿Sa露出燦爛笑容的一刻。
採訪：王連連