香港單車節搵咗新鴻基地產冠名贊助，新地主席兼董事總經理郭炳聯同執行董事郭基煇Adam都落場「破風」支持，其中參與35公里挑戰組嘅Adam，活動開始前約半個鐘就到場熱身；雖然晨咁早，但佢冇乜倦意，好精神咁同其他車手傾偈。已經備戰咗3個月嘅佢賽前話會全力以赴；一聽到鳴笛聲，立即好專業咁俯身衝前猛踩油。
Adam早前講過希望一個鐘內完成，結果佢噚日以１小時零18分鐘完成賽事。咦，咁咪唔達標囉？又唔可以咁講喎。皆因賽事中途暫停過約15分鐘，又一如唔少參加者所言，其間人多塞路兼有車，扣除呢啲問題，未必需要一粒鐘，難怪八方聽聞Adam都滿意呢個戰績。

范國威塞車玩selfie

至於前晚冒雨參加「總裁慈善單車賽」、Adam嘅阿叔郭炳聯，噚日再接再厲參加10公里悠遊組踩單車，唔知係咪因為前晚啱啱踩完車，仲有啲攰呢，賽事開始之初，佢已經開始慢速前行，踩得有啲辛苦咁噃，最後以約一個鐘完成。郭炳聯希望透過今次活動，鼓勵大家多做運動。
兩位立法會單車友，民主黨胡志偉參加35公里挑戰賽，一個鐘20分鐘完成，新同盟范國威就參加10公里。胡志偉話有個上斜位，悠遊組參加者唔夠體力要落車推，令佢哋都塞咗喺度，否則時間可以再短啲，支持多啲搞單車節活動。范國威則話冒雨破風幾好feel，雖則中間被截停約15分鐘，卻造就佢可以selfie一番。

李八方
mailto:[email protected]