全球拆息持續下跌，香港更加出現水浸情況。港滙近日接連觸及強方保證上限，金管局多次被動承接美元沽盤，沽出港元，變相向銀行體系注資，令銀行體系結餘增至超過300億元。閒資充斥下，港元隔夜息跌至僅8點子，1個月拆息回落10多點子至1.4厘，3個月拆息更由本周初的3.1厘勁跌至2.8厘，回復至9月中水平。
雖然拆息勁跌，但銀行家口風仍然強硬，滙豐控股（005）及渣打銀行（2888）均一再強調無減P空間，反而華資銀行東亞銀行（023）有點良心，表示年底前有機會減息。由於銀行拆借資金成本大降，理論上會四出「搵生意」，但經濟前景今時唔同往日，銀行落雨收遮，變本加厲的情況反而不時出現。

棄樓按攻財富管理

本來樓按是相對保險的生意，但銀行嫌無肉食，已經近乎放棄樓按生意，肯放款都只用P去計，成功申請個案則更少。睇來睇去，銀行資金似乎無乜出路，但投資機會點會無，銀行極有可能又再重複過去幾年的舊路，將資金拿去投資債券（穩陣高息債券通街都係）。
另一方面，高息定期不再，銀行又極有可能向存戶推銷投資產品，雖然雷曼迷債事件之後，人人聞債券色變，但投資產品五花八門，有錢人都一早轉買CB，賺錢人人鍾意，財富管理呢門生意點會無得做，Sell基金都有排做啦！銀行裁員，有無見過佢哋搵私人銀行部門開刀？歷史不斷重複，雷曼迷債事件，銀行雖被人唾罵，但其賺錢能力卻唔係咁差，本地銀行股因此未必無得炒，所以富邦銀行（636）、永亨銀行（302）呢類股票近日彈力十足，以昨日高位計，前者較上周四的一年低位1.50元，反彈72%，後者較上周三的一年低位33.05元，反彈38%。
歐陽風