噚晚喺灣仔伊館，上演咗兩場籃球比賽，頭場係吳若希個緋聞男友劉子健做教練，由幾個新歌手組成嘅VR1，對戰籃球挑戰賽(中學組)冠軍組，結果係VR1贏咗比賽。

尾場就係余文樂嘅橫洲工業，對跨世代球星隊，呢班明星隊係由70-90年代打聯籃球星組成，樂仔就搵咗外援幫手，佢就係打過NBA嘅中國國家隊球員易建聯，樂仔介紹佢出場嗰時，全場尖叫，而樂仔嘅好朋友彭于晏都現身撐場。

有外援幫手嘅橫洲工業，最後以101對87贏咗場比賽，不過樂仔自己手風唔係咁順，全場拎得兩分，但都有幾個助攻。而甲一球員劉子健都有份代表跨世代球星隊出賽，結果佢拎咗三分王，易建聯就得到MVP(最有價值球員)。

講到搵易建聯幫手，樂仔興奮話：「今年想找朋友嚟幫手打，佢本身喺LA，啱啱返嚟準備集訓，佢好忙，我最驚係佢受傷，呢樣真係負擔唔起，背負國家責任，至於彭于晏就咁啱嚟香港拍戲，佢媽咪同我媽咪都好熟，所以成班人一齊嚟睇波。」

講到樂仔老友郭富城俾人話追SuperGirls，而傳聞話係樂仔介紹班女畀城城識，佢話：「我都唔知，我只係識得Heidi(李靜儀)，佢係朋友嘅朋友，是但，娛樂新聞一則，笑下就算。」

至於有傳劉子健同吳若希拍拖，劉子健澄清：「我哋只係好朋友。(有冇發展機會?)好朋友囉!(有冇女朋友先?)我冇女朋友。(對佢印象點?)大家都係好朋友。(係咪你杯茶?)之前喺雜誌受訪，講過鍾意可愛同細細粒嘅女仔。」吳若希咁高，睇怕都唔係佢杯茶喇!


識睇，一定係睇足英台【英波Live】：

http://soccer.appledaily.com
http://bit.ly/engballlive