韓劇《陽光先生》李秉憲嘅41歲胞妹李智安(前名：李恩熙)於2012年結婚，前年被爆離婚收場，結束4年婚姻。

李智安近日亮相TV朝鮮節目《戀愛的味道》，力撐有份出演節目嘅好友徐秀妍，徐秀妍喺節目內同韓劇《急診男女》嘅男星李必模談戀愛，而徐秀妍則帶住李必模到訪李智安經營嘅民宿。喺節目內李智安充當紅娘，喺現場不斷發問，當中問到李必模幾時開始鍾意徐秀妍時，李必模就直認對徐秀妍係一見鍾情，第一次見到已經喜歡上對方。

緊接李智安更直接問李必模會唔會真係想同徐秀妍結婚，而李必模就直認自己太喜歡秀妍，亦都有呢個想法，徐秀妍即向李智安大讚李必模話：「佢係一個唔錯嘅人，越睇越好。唔係做節目嘅時候亦都一樣。」

由於李智安已事隔多年冇亮相公仔箱，所以佢嘅近況即時成為觀眾嘅討論對象，再次惹來大眾嘅關注。事實上李智安比李秉憲更早出道，佢係童星出身，於1996年參加韓國小姐獲得冠軍，只拍過幾部電影後就淡出演藝圈，2013年曾出演JTBC節目《Miss Korea秘密的花園》。

精選韓流，喺晒《娛果》
http://fb.com/appledailyent