當年今日

12萬東門設特許經營首飾專櫃

蘋果日報 2002/06/10 00:00


雖然加盟特許經營店是在大陸創業的好開始,但要賣甚麼貨品才可以把風險減到最低呢?當然是那些保證不會積貨、不會受季節影響的貨品,例如女性飾物便是個好例子,皆因它體積細小佔地不多,而且售價不太昂貴,較符合客人的消費意欲,加上款式多,梗有一種啱口味,是以對未捉摸得到客人心態的創業初哥來說,應會是個很好的起步點。
記者:羅蘭
攝影:MannyYeung
特許經營初哥最啱
做生意有時都看機遇,就好像唐小姐,她本在香港做手袋生意,因為覺得香港零售市道差,生意愈做愈困難,所以便到深圳看看有沒有發展機會,嘗試到內地創業。
「我本身都係福州人,很早已移民香港,但我仍經常往返內地,除咗喺呢度有朋友外,重會睇吓有無生意可做。半年前,我喺深圳華僑商場見到呢個牌子嘅首飾專櫃,就已經覺得佢哋嘅產品幾靚,於是咪問吓朋友做唔做得過囉。」唐小姐話,她自己和朋友都覺得做特許經營的好處是不需要擔心貨源,而且品牌又為客人熟悉,不用自己做宣傳,就連款式設計,都有專人去做,所以特別適合她這種初哥。
一次過加盟費?10,000
因為加盟費只需?10,000便可營業,而且以後都不需要再交,唐小姐覺得這樣做加盟商,條數計得過。「其他出名嘅品牌加盟費,閒閒哋都要三、四十萬啦,重要每年畀㖭,所以就覺得呢個品牌特別抵。嗰時係我自己主動去問艾菲兒做加盟商嘅,所以佢哋會先同我會面,睇吓我究竟適唔適合,然後當然問吓我喺大陸識唔識人,如果識人,會較易攞個特許經營牌。」
傾租約欠經驗總公司派人協助
「由於我一向都知東門步行街太陽廣場附近有好多批發商,唔少人都會嚟呢度買嘢,所以我就去問太陽廣場有無吉位出租,咁啱佢哋又有,我就決定租呢個約200呎嘅位置。」由於唐小姐內地生意經驗淺,跟百貨公司傾租約事宜時,還有總公司的人陪她。
「佢哋會幫我同百貨公司嘅人傾租約,而且好多牌照我都唔使攞,好似消防、營業牌照咁,我只需要帶自己嘅身份證,喺艾菲兒嘅授權書度打個手印,跟廣場簽份租約就可以做生意,好簡單。」
員工需具擔保人擔保費
至於請人方面,都係由總公司幫忙找人。「員工要喺深圳搵一個擔保人,同交?2,000擔保費先會考慮聘請。我唔擔心員工嘅操守,因為呢間廣場嘅好處係所有錢都係統一收費,員工唔會直接收錢,我需要做嘅係每個月盤點一次貨,唔啱數嘅就要員工負責。補貨方面,我又只需一個月入貨一次,而總公司每星期又會派管理員嚟巡舖,以防有乜問題發生。所以我根本好放心,一個星期上嚟巡一次都無問題。」
唐小姐話她加盟連鎖店是貪它有一條龍式的服務:貨源、裝修、宣傳、請人、員工培訓、傾談租約、申請牌照等都由總公司一手包辦,她只需拿出資本,然後便可「印印腳」做老闆,好適合她這種甚麼也不大清楚的初哥。
人流旺百元戒指手鏈熱賣
講到客源,唐小姐話這個品牌的彩銀首飾(彩石鑲銀),正好配合時下的趨勢,加上售價不貴,平均一隻戒指或頸鏈約售?50至?160,是以年紀輕輕的深圳女性都可以買得起。此外還有套裝首飾,約售?200至?650,較適合成熟的女士。
「呢個專櫃嘅人流好旺,我諗一日有二千人以上,好多OL同後生女都會上嚟買嘢,通常買嘅主要係一百蚊左右嘅戒指、手鏈咁,而中年女性就會買一整套套裝,大約都係三百蚊。我鍾意開首飾店係因為佢佔地方唔多,一年四季都啱戴,而且買咗之後發覺唔啱嘅,都可以攞返總公司換,所以積貨嘅情形就相對減少。」
下半年大計福州開分店
開業半年,唐小姐對營業額尚算滿意,還打算在鄉下福州開第二間分店。「雖然盈利不多,但上嚟做生意,我只抱住唔使蝕已足夠嘅心態,所以我打算下半年會喺福州開第二間,因為所需資金唔多,而且喺商場或百貨公司搞,又毋須擔心要自己親力親為嘅問題。好似我𠵱家咁,每個星期都係上嚟一、兩次,唔使煩幾好!」
艾菲兒開業本錢
舖租(於營業額中抽35%取替,開業後一個月才收) ?0
裝修 ?15,000
入貨 ?50,000
人工(1名) ?1,000
加盟費 ?10,000
買貨按金 ?20,000
流動資金 ?30,000
總投資額 ?126,000
平均每月營業額:?50,000
平均每月盈利:?15,000

加盟艾菲兒條件
1.有管理方面的經驗和能力。
2.需找專賣店(80平方呎以上)或專櫃(30平方呎以上)的地方開業。
3.有相應的投資能力。
4.有生意經驗及市場推廣能力。
註:艾菲兒現時亦開始在香港擴充業務,加盟費全免,查詢電話:96828692

牌照申請
因為艾菲兒係連鎖式加盟店,所以加盟商只需要得到總公司的營業授權,便可以開店經營。另外唐小姐租的舖位是在廣場內,所以亦毋須申請消防或其他牌照,因為廣場方面會為她全權負責。

創業心得
1.創業者不妨考慮加盟形式,免卻申請牌照。
2.若是初哥應找一些免加盟費或低加盟費(最好交一次便終身免交)的品牌,投資金額便會少好多。
3.內地有人事關係最好,因有人提點,不用自己亂打亂撞。
聯絡我們
面對香港經濟不景,裁員不停,失業率持續上升,香港經濟逐步轉型,人人北望。「北上創業」版訪問一些香港人在內地成功創業的例子,如閣下是其中一分子,又願意將你的經驗跟讀者分享,請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真:27420542。請附聯絡電話。