張紋嘉（Crystal）今日到商台接受《公子會》訪問，她心知難敵眾主持尖銳口才，唯有準備反客為主提議傾談主題，她指之前已經講過初戀及甜蜜事，今次不如講分手，她表示感情路上一直是弱者，是「被分手」的，即使查看電話得知男友出軌也啞忍，深怕換來分手收場，試過20歲左右，當時男友每晚都行開傾兩小時電話才回來，她說：「佢同我講跟人學國語，我又信，之後佢話一個人去泰國旅行，叫我唔好msn佢，我又信，其實佢係識咗個台灣女仔，我真係好豬，點解會信佢，而家諗起就好好笑。」

張紋嘉表示年紀細時，拍拖會將男友放大，變成自己的一切，每當分手時心靈都傷痕累累，會選擇搬屋及去旅行逃避一切。人大了，開始明白不應該太投入去愛，跟現任男友有各自空間，相處舒服，信任感又高。當談到宋慧喬與宋仲基離婚一事，張紋嘉顯得相當震驚，完全不知道此事，她說：「好可惜，我又再唔敢結婚，佢哋好童話都咁，我有時諗婚姻，兩個人一齊住係咪會容易咁（離婚）。」Crystal坦言自細父母已經很少一齊相處，一家人沒有家庭活動，令她對婚姻概念存疑問，反而父母分開後，自己分別跟他們相處時間更多，所以亦令她沒有結婚念頭。

另外，新人黃進林今日到商台宣傳新歌《分開紀念日》，未入行前已經有3年街頭Busking經驗，他自覺對現時演出非常有幫助，加上已累積了一批歌單在手，演出也可以隨時用到，問到Busking時可有難忘事發生？他說：「有呀，大約兩年前試過喺中環遇到陳柏宇經過，我邀請佢不如一齊唱，佢話好，本來提議唱佢嘅歌，但佢話唔好，可能唱得太多，之後合唱咗側田嘅歌，好似係《三十日》。」

當初唱Busking原因是自己多次參與歌唱比賽，成績也不如理想，之後便想到創作平台分享自己音樂，他指玩Busking時都遇過被趕，身為過來人，他提議政府可參考澳洲做法，之前他跟朋友到當地Busking，事先要申請，再面試，獲批後便在指定地點和時間盡情地唱。

-----------------------------
7月4日起 《蘋果動新聞》只限升級壹會員閱覽
繼續撐蘋果！