食衞局前局長高永文噚日出席公開活動時，聽到記者問及盛傳代建制出戰九西補選嘅前政助陳凱欣，被質疑偷步銀彈戰宣傳兼涉用特權幫行家打尖睇醫生後，唔介意「講完」又講為愛將護航，全面力撐對方出戰，今日佢哋兩個終於合體現身嘞，於香港潮屬社團總會喺維園舉行嘅盂蘭文化節中組成潮人健將隊，參加搶孤冠軍邀請賽，合拍度呢，仲駛多講？而原來大家一直只知民望高係潮州人，唔知陳凱欣老公邱文華都係架己冷，即係呢位建制派選手，都係潮州新抱。

而包括何君堯、姚思榮、謝偉銓等立法會議員亦有組隊參賽，首次參加嘅何君堯據聞表現好「勇武」，接到近十個米袋，獲唔少人士大讚有天份，而佢邊接仲邊大叫「執到嘞」，投入度有百分百。負責組隊嘅潮州人姚思榮卻只接到僅僅一個咁多，仲少過去年嘅兩個，難怪佢自己都話下年要努力啲。

主席陳幼南喺頒獎禮致辭時話，活動令大家更直接了解盂蘭文化嘅內涵同意義，潮總未來除咗繼續做好推廣盂蘭文化工作，仲會繼續發揮盂蘭文化為社會和諧所起嘅作用，兼做好盂蘭文化嘅傳承。