警方告岳少超速單嘢未收到科，警隊「二哥」、副處長任達榮噚日出席西九龍總區警察總部改善工程竣工儀式，八方諗住問吓身兼道路安全議會主席嘅任Sir，究竟支雷射槍仲可唔可靠，司機收到「牛肉亁」點算好。任Sir有班盡責下屬，為免阿Sir掃興，唔畀記者入場，更派出幾位警員喺門外戒備，等佢快閃走人。
噚日多位警隊高層去西九總部贈興，因為嗰度有「寶」。改善工程包括翻新一個有83年歷史嘅大花瓶。呢個花瓶最先擺喺九龍太子道前九龍警察總部大樓，當時有六件同款設計，後來興建太子地鐵站拆卸大樓，警長李佳光識貨，先有一個花瓶倖存至今。
西九總區指揮官盧奕基發現寶物，舊年促成專家復修個花瓶，洗走舊油迹重新打磨，呢個有玫瑰雕花嘅古典花瓶，𠵱家同差館內關公像互相輝映，喺情人節當日退休嘅盧Sir玉成此事，大名亦同呢件寶物一齊永垂西九總部。