鄉議局噚日團拜，煲呔率領一眾高官空群而出，其中德成局長最識做，喺台上致辭時向發叔落足鞋油擦晒鞋，話託發叔鴻福，年初二為香港求到上籤，以後要多多合作咁話。發叔亦回應話，難得咁多位高官盡出，多謝各位畀面。仲記得肥平局長當年為香港求咗支下籤，香港嗰年就爆沙士，衰到貼地，搞到佢以後唔敢再求，其實曾德成應該多謝肥平。
記者又問發叔，下一屆係咪將區議會個議席讓番畀葉國謙，發叔唔客氣咁話傾向留任，仲暗寸民建聯得嗰150、160票，都唔夠贏一席啦。喺鼠年佢仲老鼠跌落天秤，自讚話佢任內為區議員成功爭取加人工，好受歡迎喎。睇嚟葉國謙要重返區議會，真係有啲阻力，唔係咁容易喎。