港台今日宣佈將「第41屆十大中文金曲」的「金針獎」，頒予出道超過三十年的達明一派，黃耀明同劉以達現身記招分享感受，明哥指最期待明年一月三日於頒獎禮上獻唱。

84年達哥登報搵主音夾Band，當見到明哥後便知道找到了，達哥說：「佢把聲好夾啲歌，音樂口味又非常接近，大家都鍾意英倫、電子同迷幻歌曲。」港台邀請了林二汶及兩位Fans分享怎樣受達明影響，二汶指達明影響自己整個青春，明哥當年簽了自己，便開始了音樂生命。當司儀講到大陸不少人聽達明音樂長大，明哥說：「大陸我哋唔方便去演出，不過可以叫佢多啲嚟香港，香港暫時仲睇到。」

獲得俗稱老人獎嘅金針獎，達明斷言不會離開樂壇，此獎反而是推動力，令他們加快錄音步伐，明年推出新專輯，更計劃於中小型場館舉行音樂會，詳情待落實後再透露。講到二汶分享受達明影響時，明哥感觸說：「我諗應該仲要多一位喺度，就係盧凱彤，因為佢同達明同一日出世，我哋第一張大碟係86年3月27日出，佢係同一日出世。今日都仲好掛住佢，希望佢喺度，不過佢未玩完嘅音樂，就等我哋幫佢繼續玩落去。」

精選娛聞，喺晒《娛果》
http://fb.com/appledailyent