伍詠薇與老公練海棠越來越恩愛，原來今年係老爺同奶奶結婚70周年，練家有喜，作為新抱嘅伍姑娘肩負做導遊任務，安排四代同堂，共18人去三亞旅行，伍姑娘日前將幸福家庭樂照片貼facebook分享，部份親友更由加拿大回來參加，呢次旅程高興又熱鬧。

原來此行，唔單止為老爺奶奶慶祝結婚70周年，伍姑娘仲為姑奶夫婦慶祝結婚40周年，同埋慶祝老爺奶奶外孫女出嫁。但由於一對準新人將於出年喺加拿大結婚，公公婆婆年紀大唔方便坐長途機，一對準新人就去三亞先搞婚前派對，逐一向長輩斟茶。當中仲有老爺奶奶兩個曾孫，四代同堂，老人家笑不攏嘴。伍姑娘貼相後留言：「雖然帶團安排有點疲倦，但一切都非常值得，恭喜各位親人，祝大家都身體健康，開心快活順心如意。」

相片中，伍姑娘更同老爺共舞，佢留言：「與練老爺共舞，喜歡這照片。」伍姑娘老公練海棠即回應：「只有你勸得服大老練跳舞，勁。」伍姑娘即答：「超級瘋狂家嫂。」《蘋果》今日打畀伍姑娘，佢話旅程好開心，講到同老爺跳舞：「醜死怪，好casual同家人去三亞度假，老爺奶奶結婚70周年唔簡單，我同老公出年就結婚20周年。老爺骨頭都硬晒，所以跳舞時，我唔轉佢，佢轉我。」

精選娛聞，喺晒《娛果》
http://fb.com/appledailyent