張崇基同張崇德近日開始為下月演唱會積極排舞，兩人今日去到新城宣傳，對上一次有跳舞演出，經已係十年前跳咗幾分鍾，事到今日，佢哋直認係體能同意志挑戰，崇基話：「今次會跳三首串燒歌，合計有成十分鐘，0依家已經排咗兩次有成六個鐘。」崇德指有將排練片段畀七歲大囡囡過目，點知換來囡囡指唔合格。

喺舞台上走位同唱歌完全難唔到佢哋，講到跳舞佢哋真係要下苦功，兩兄弟決定餘下唔夠三個禮拜，會不停加操，希望至少也令觀眾睇完會笑。

問到兩兄弟邊個較為靈活？崇基話：「細佬身型跳起上嚟較似舞蹈員，而我就手長腳長無咁好睇。」崇德透露跳舞老師指崇德上半身較靈活，而佢自己就下半身靈活，所以剛好結為組合互補不足。