一年前左右，33歲「處女黨」成員苟芸慧（苟姑娘）就獲44歲男友、錫礦大王後人陸漢洋送上陸媽媽留俾佢嘅家傳鑽石鑲製而成嘅訂情戒指，仲已經定埋婚，不過婚期就未定幾時，但其實呢一對都好恩愛，就算訂咗婚又拍咗一段時間，佢哋都仲好似一對熱戀期嘅情侶一樣。

日前下午兩三點左右，苟芸慧就同埋男友陸漢洋喺金鐘現身，苟姑娘重裝上陣，又戴太陽眼鏡又戴口罩，而男友就冇遮掩。呢對情侶就算行咗咁耐，都仲於熱戀期，兩個行街嘅時候，不時又會拖下，又會對望甜笑，話佢哋兩個啱啱開始拍拖都有人信。

苟姑娘同男友陸漢洋行到咁上下，就離開商場上車，由商場行到去部車嘅期間，陸漢洋都係拖住苟姑娘十指緊扣，見着住鬆身裙嘅苟姑娘落梯級時特別小心，透出孕味。陸漢洋又細心為未婚妻開車門，送到佢上車再閂埋車，自己先再上車，有風度到不得了，男士們真係要學下嘢，不過都係嗰句啦，首先你要有個....

陸漢洋噚日接受《蘋果》訪問，透露當日係陪苟姑娘去驗眼，佢話﹕「佢呢排工作好忙，長時間帶 con，所以眼睛比較攰同乾，可能要轉con 牌子，醫生話一切 OK， 所以唔使擔心。」。問到咁緊張扶到實，係咪奉子成婚？陸漢洋話﹕「拖手係正常情侶都會做既事情，Sweet係應該嘅，婚禮一切仍然決定保密，講咗3日前會通知大家，奉子成婚就百分之百冇可能。多謝關心。」而苟姑娘亦以短訊回覆﹕「幾年之後(生BB)，要畀啲時間做準備。」

精選娛聞，喺晒《娛果》
http://fb.com/appledailyent