港姐出身嘅陸詩韻10年演出過彭浩翔執導嘅《志明與春嬌》做余文樂嘅女朋友。而之前亦都參演過莊文強、麥兆輝聯合執導嘅《竊聽風雲》，而呢套就演一名差人，同陳偉霆合作。事隔7年佢再次喺大銀幕，演出《霸王花2之不義之戰》，聽個名就知唔係齋講，而要落手落腳打，同劇仲有打女梁琤、林明禎一齊演警隊嘅精英部隊。戲入面除咗肉搏武打鏡頭，仲有飛車、爆炸、槍戰場面。第一次做打女嘅陸詩韻都話係想唔到咁辛苦，佢話：「咁大個女，第一次拍咁大陣仗嘅場面，係一個好好嘅嘗試，不過就搞到成身傷痕。」佢話所有都要重頭學起，喺現場就有專人教點揸槍、開槍同上彈，詩韻大讚梁琤好專業：「梁琤有功夫底，動作同槍戰場面當然駕輕就熟，原來槍都有分好多種、揸槍又有好多技巧。我成日一開槍就合埋雙眼，所以公司專登安排咗射擊訓練畀我射靶，講真之前乜嘢係彈匣我都唔知，梁琤教識我好多揸槍甫士同技巧。」

陸詩韻話動作場面盡可能親身上陣，仲搞到成身瘀晒。詩韻近年從事美容生意，佢話拍戲同做生意冇牴觸，當然希望可以雙線發展。佢話拍戲對做生意有幫助。「知名度高咗幫到美容店，拍戲又有好多女仔，佢哋試過好都好幫手推廣。」詩韻話最辛苦係要拍完戲返屋企仲要對住部電腦處理美容院工作，不過呢個係好嘅付出。