【李八方online】政府慢4拍出「澄清網」 777仲未明管治問題所在
蘋果日報 2019/12/18 16:50
林鄭月娥政府新聞網李八方ONLINE
八方覺得林鄭最大嘅挑戰，相信係管治冇認受性多過係市民受「假消息」影響，似乎林鄭至今都未明白問題所在。
登場慢4拍、經常甩轆嘅特區政府，又有新笑料。佢哋專登喺《政府新聞網》之下整咗個叫做「政府澄清」嘅網頁，將由今年7月至今，每份政府發過嘅澄清新聞稿放埋一齊。真係唔整由自何，一整笑死我，尤其再睇埋特首林鄭月娥嘅Facebook，就係唔笑至出奇。
林鄭喺Facebook話應對近月社會事件中，其中一個挑戰係「假消息」，好似8.31太子站死人、政府會宵禁、限制市民㩒錢、同埋...同埋林鄭已向中央請辭等等，佢話呢啲消息都係穿鑿附會，甚至毫無根據，有啲仲係惡意杜撰，旨在挑動社會矛盾或引起恐慌。
跟住林鄭話喎，特區政府已經盡力闢謠㗎嘞，近半年透過記者會、網站、新聞稿等澄清咗過百條假消息，未來亦會繼續，以正視聽，但造謠比闢謠易，最緊要係市民保持冷靜，認真思考，對來歷不明嘅消息小心fact check喎，仲話已經要求政府新聞處同各部門加强監察，澄清假消息要做到「快而準」。
查實八方覺得呢幾個月嚟，面對政府拒絕回應有過百萬人上街要求嘅五大訴求，市民已經好冷靜同埋克制，而對林鄭最大嘅挑戰，相信係管治冇認受性多過係市民受「假消息」影響，似乎林鄭至今都未明白問題所在，即係市民已經唔信呢個政府，即使政府再出幾多澄清，係咪真係有用？