周日非國盃決賽,科特迪瓦(圖)同加納踢足一百二十分鐘都冇紀錄,結果大象國喺馬拉松式互射十二碼以9:8險勝封王。極刑戰過程緊張,前鋒謝雲奴都喺後備席廂隔籬擔凳仔,冇眼睇。謝雲奴喺加時下半場臨完場時被換出,所以亦冇份射十二碼。當其他後備球員好緊張咁睇隊友射唔射得入,謝雲奴就勁驚死咁拎張凳背住坐低,唔敢睇互射十二碼過程。自一九九二年之後科特迪瓦終於再贏非國盃,可惜嘅係名將杜奧巴之前五次領軍出戰都贏唔到冠軍,一退出國家隊就搞得掂。不過杜奧巴都一樣咁投入同高興,仲將佢同朋友一齊睇波嘅片放上網,到鎖定冠軍嗰一刻開心到成個跳起。