支持曾蔭權補選特首的闊佬，當年也曾誓神劈願支持董先生，一句「我挺董」鏗鏘有力，變成董先生攀上神壇的通行證。
闊佬是做生意的，當年公開去貨預計賺硬的如意算盤，今日證明蝕大本，用投資眼光評審，屬於長揸長輸的蟹貨，相當失敗。生意佬算過度過，點解都會蝕入肉，外行不便評論，但肯定一點，生意人之所以落叠，沒有利益輸送的話，就算流一世香港血，飲三世香港水，都難以鬼推磨。

挺董已成過去（雖然事發在多事的三月，距離這個五月春夏之交不遠），挺曾是現在進行式，來來去去卻是同一批人。當年今日，追悔莫及；今時今日，又試猴急，表態動作是那麼熟練，生意人顯然不是政治材料，演技張揚，穿崩鏡頭多，大部份預計今次可以做成曾蔭權這單政治大買賣的人，有機會再次坐艇，斬倉都會蝕剩底褲，比侯賽因更侯賽因。
由看風駛𢃇額頭鑿住＄字的生意佬做助選軍師，不曉得曾蔭權這鋪自摸打幾大。上手董先生錯在重用家臣，曾蔭權不會儍到搵管家出馬（幸好路祥安冇得留低），明智地調動官場老拍檔幫拖，雖然沒有驚喜，倒算是合格的組合。未來兩年，港英舊班底vs財團富豪的這個局，明爭易冚但暗鬥隨時曝光，以戲論戲，應當會有高潮，要是只得兩年戲的話，實在早洩得叫人遺憾。