羅馬王子托迪終於走到職業生涯最後一季，又係時候話下當年。托迪喺羅馬成名之前，喺96年代表U21意大利國家隊贏過96年U21歐國盃冠軍，當年決賽對住東道主西班牙，有兩個球員領紅被逐下，踢到互射12碼險勝封王。當年決賽嘅正選陣容，除咗托迪之外，正選11人其他人都已經退晒役，當中有唔少名將。

當年意大利嘅後防線簡直球星如雲，有簡拿華路（Fabio Cannavaro）、尼斯達（Alessandro Nesta）以及彭路基（Christian Panucci），前兩者絕對係星級後衛，到06年仲同托迪一齊贏埋世界盃冠軍；中場方面就有同托迪一齊效力羅馬多年嘅湯馬斯（Damiano Tommasi）。至於其他當年嘅小將，例如前鋒N阿武羅素（Nicola Amoruso）、守將費斯（Salvatore Fresi）同埋門將柏高圖（Angelo Pagotto）之後發展就好一般咯。