今時今日，唔畀功課嘅幼稚園唔知重係唔係受歡迎呢？大記者曾經陪佢位同學帶個仔去九龍塘著名幼稚園面試，呢間幼稚園人人爭住讀，據講男畢業生入小喇沙，女畢業生入瑪利諾咁巴閉。大記者話：「老師問完幾條問題，話你哋答得好好，呢度有紅黃綠白四粒糖，你哋鍾意邊粒呢？我同學嘅仔答紅色，於是先生送佢一粒紅色糖。兩個星期後，收到通知——不予取錄。同學好失望，問番一齊為子女申請入學幾位朋友，只有一位入到呢間巴閉幼稚園。追查研究之下，入唔到嘅細路都好老實，都話我鍾意黃色、白色、紅色之類。入到嗰位精叻女就答：我四粒都鍾意，可唔可以畀晒我？你話其中有乜微言大義呢？」
左丁山答：「細路女大概鍾意玩大富翁，贏就攞晒，夠進取心也，但如果人人如此，學校內嘅學生咪經常爭崩頭？咁嘅氣氛，對細路好唔好呀？」大記者話：「話之你，總之要入名校。」