所謂人望高處，對馬主來說，如贏過中班頭馬，梗係想贏一、二班，甚至挑戰更高層次級際賽。反過來食慣魚翅者，可能都想整啖粉絲，一對老友記馬主包大偉及張顯信，今次就似乎出現這種情況。

包大偉及張顯信兩位養馬廿幾卅年，大賽頭馬固然唔少，高班賽更多的是，但五班賽偏偏未贏過，且加埋幾十匹冇一隻落過咁低班。不過甜的吃，苦的也吃，二人夾份嘅團體馬「好有米」，可能為佢哋帶來第一次贏五班賽。

列陣今晚（7日）快活谷頭場五班1800米嘅「好有米」，上回初降至五班，即55倍大躍進跑個第四，明顯地已減夠分到位，今場用羅理雅抽3檔好位，難得咁好牌面，睇嚟一定鬥志如虹。