【揸數管財政】黃翠如預告做C君婚禮兄弟團 認飲補品補身
蘋果日報 2019/07/08 17:45
黃翠如婚禮證婚C君鄭詩君
（右圖攝影：張俊銘）- 黃翠如為好友C君的大日子提供不少意見。
黃翠如今日到沙田為嫁喜禮品產品宣傳，翠如透露好友鄭詩君（C君）將於年尾12月8日在香港舉行婚禮，她答應對方做兄弟，翠如說：「今日幫佢嚟傾，睇吓買嘢有冇優惠，我係唯一一個女仔做兄弟，我會幫佢處理財政，搜羅好嘢。因為我唔想做姊妹，又唔想着裙，我想舒服啲着褲，我會幫佢啲兄弟去深水埗搵衫，類似日式鬆身款式，C君話要搵靚牌子，我話兄弟冇乜所謂，我會幫佢搵啲靚衫。」
翠如表示婚前曾想找C君做證婚人，她說：「佢話想做，但到我結婚時佢又要拍戲，所以做唔到，加上我結婚都係請咗家人同好少朋友。」有否向C君教路？翠如說：「佢成日問我喺邊度簽紙方便，我做咗好多資料搜集，喺日本簽紙其實係唔承認，而且好麻煩要識講日文，所以我哋去咗紐西蘭，當地係承認嘅，其實有好多唔錯嘅地方，佢嫌麻煩，最終決定喺香港搞。」
有飲滴雞精保身的翠如透露，C君與一班朋友上到她屋企都會飲，翠如直認因為身體不太好，所以有調理身體，至於是否準備做媽咪，翠如表示即將要拍節目，一邊調理身體一邊拍節目。翠如指蕭正楠很喜歡小朋友，對小動物又有愛心，她說：「佢就算同隻貓玩都可以玩幾個鐘，佢又會幫我隻去完廁所嘅狗狗清潔，我自己都唔會做，所以我隻狗好黐佢，我隻狗狗係閹咗嘅男仔，兩個成日黐住，好似同曹永廉嘅關係，不過阿廉冇奄。」