【韓流】《野蠻女友》集集追:周元 吳漣序情深擁吻
周元集集追我的野蠻女友吳漣序
由周元同吳漣序主演嘅韓劇《我的野蠻女友》(野蠻女友)嘅韓國月火劇(逢周一及周二晚播出),今晚播出第19及20劇(即第十集),港劇迷0依家就可於Viu app上同步追看繁體字幕中文版本。
承接上一集《野蠻女友》講到周元飾演嘅才子甄佑回宮搵吳漣序飾演嘅惠明公主時,遇到清國王子,王子邀請周元同吳漣序到河邊許願,王子仲講出自己願望希望永遠同公主在一起,不過周元就唔肯幫佢翻譯畀公主聽,王子似乎都睇得出周元鍾意公主,於是就話自己會親自同公主講。
王子邀請周元飲酒,仲話打算喺宴會上同公主求婚,並要求周元幫手,令周元大感不是味兒。而王子為咗令到吳漣序嘅胞弟元子接受自己,於是就送上望遠鏡畀元子,又知元子因為唔捨得家姐嫁到去清國先對自己反感,王子就安慰元子話:「我已故嘅母后亦都係朝鮮人,母后好懷念朝鮮,所以經常同我提起呢度,但係即使咁樣,並唔代表喺大清唔幸福。我亦會努力,會寵愛公主、愛佢、保護佢,一定會讓佢成為最幸福嘅公主。婚後亦會成日嚟朝鮮,等你一直見到姐姐。」
王子邀周元比武,周元亦從王子口中得知喺王子身邊嘅翻譯官朱太監早前已經代王子同王室提親,周元覺得朱太監相當有可疑。清國派人送嚟公主嘅聘禮,公主亦同王子慢慢以文字進行溝通,呢一切周元都睇在眼裡。原來清國嘅聘禮竟然係走私犀牛角,此時突然有人要做調查,原來此舉正係周元同李正信飾演嘅使節姜俊英設嘅計,用意係拆穿朱太監佢哋私通互利。
公主知道周元嘅事情後,因為擔心對方嘅安危,唔顧危險都堅持要搵周元,於是周元主動拜訪,又問公主係唔係擔心自己,反問公主明明叫自己唔好操心同擔心公主嘅事,點知公主又咁緊張,兩人因而雙眼透紅,終於忍唔住愛火熱吻起來。