當年今日
關於我們

【試食分享】旺角煮場 6大人氣食店|大仁生活

蘋果日報 2018/06/12 15:00

大仁生活蘋地地區消息大仁生活專欄旺角

住在旺角,望著工業貿易署由圍封、改建、裝修,霎眼又兩年,現在已變身成旺角新商場T.O.P。雖然零售部份仍然未全面開業,不過,地庫的新Food Court 「旺角煮場」6間食肆已經全部可以食得啦!

今次6間食肆有一半是過江龍,而唯一一間要收加一服務費的便是「味の時計台」。這間的賣點是叉燒輕輕煎了一點,所以較一般拉麵叉燒口感大大不同。我會推介牛油粟米蔬菜豬骨湯底($85),因為SY吃的味噌叉燒拉麵 ($87)味過很濃,這並不是我杯茶。而紫菜($10)、牛油($8)、叉燒($15)均可以額外添加。不過,計我話:「仲有5間喺出面,食其他嘢仲好過啦。」

「味の時計台」推介度: ★★★☆☆

而大力水手「Popeyes」則是長期有一條人龍在排隊的,本來全港只有機場有得吃的「Popeyes」炸雞,現在旺角一樣食得到。單看外表,你會被乾爭爭的外表所瞞騙,但其實入面肉質又嫩又Juice,SY:「薯條都好好食呀!」不過若果你不能吃辣的話,記得要點原味(不辣),因為它的辣真的不只是小小辣。還有茄汁也有分辣與不辣的,不要揀錯。我:「以後唔使去KFC,就嚟屋企樓下呢間食就得!」

「Popeyes」推介度: ★★★★★

PS: 2件雞+薯條+汽水套餐 $48 (如果薯條多少少,同時選擇雞胸及上髀不用額外加$2就會更加好啦)

最後一間過江龍便是「Khaosoi House」,它有賣泰式海南雞飯,不過我就揀選了比較特別的清邁咖喱牛肉湯麵 $58。SY問我好不好吃,我答:「好得意喎,佢上面係炸成脆脆嘅「清邁金麵」,中間係好腍嘅牛肉,仲滲滿椰奶香,撈勻下面湯麵,又軟又硬,好過癮。」SY:「係脆唔係硬呀!」

「Khaosoi House」 推介度: ★★★★★

自己最愛飲湯,而豬肺湯更加是非常鍾愛,(因為工序超麻煩,家中沒有人肯煲喎),我發現「蓮香」買飯加 $28就可以有一碗川貝杏汁白肺湯(單買要$48),那我便立刻買一份魚香茄子飯($48)給阿太,自己便可以加錢換靚湯啦!SY:「原來豬肺湯真係咁好飲喎!」阿太:「佢個魚香茄子都唔錯嘅,不過全日都係賣$48,中午嚟食好似無咁抵喎!」我:「其實計我話,最好厚住面皮去問吓買飯啲人,可唔可以畀我加錢換碗湯就最正囉」,阿太:「吓?咁都得?」 

「蓮香」推介度: ★★★★☆(川貝杏汁白肺湯)

當我走到「鴻師傅」前,姐姐推介我:「試吓我哋嘅皇牌,叉燒皇煎蛋飯啦!($58)(真係好好食咩?)我哋真係自己燒㗎,唔係交嚟嘅,我做咗一個禮拜,日日晏晝都係食佢,我都仲未覺得厭!」有人推介我,當然不用再猶豫,我:「佢個燶邊蛋配啲叉燒真係幾正喎。」這裡是薄片式切叉燒,雖然我已經指明要「肥叉」,但可惜也有點事與願違,不過叉燒真的燒得很入味,SY:「真係好食過屋企樓下嗰間喎!」我:「無得比啦,樓下 $34又冇蛋,呢隻蛋真係好得,如果個黃煎得生少少仲正。」

「鴻師傅」推介度: ★★★★☆

最後一間「小巷咖啡」,我看中她的刈包,她叫「叉燒肉夾包」($38)。兩件包,每件有3塊叉燒,我們兩仔爺也愛吃刈包的包,熱辣辣,再配多蔥配青瓜的夾包,本來也不錯⋯⋯不過⋯⋯SY:「點解啲叉燒咁瘦嘅?」我:「仲要幾舊都有舊骨添⋯⋯」反而SY點的煙肉芝士漢堡配薯條 ($76)會更加好食!SY:「真係喎⋯⋯佢個漢堡包好好食,除咗個煙肉,爸爸你睇吓,煙肉點會脆成咁嘅?」,可能店員見我們一老一嫩,為了襯我們,所以就給一份嫩肉漢堡加配老乾脆煙肉吧?!

「小巷咖啡」推介度: ★★ ☆ ☆ ☆
 

「旺角煮場」 Chefs’ Society

地址:九龍旺角彌敦道 700 號 T.O.P 地庫

專欄作者簡介:
大仁生活愛玩具,愛一家三口吃喝玩樂,不停四圍影影影,愛電視、愛日劇、愛八,鍾意左儲右儲,鍾意咲看仁生。  

Facebook專頁:
https://www.facebook.com/hayakutang

發掘更多身邊的小城故事,請LIKE 蘋地Facebook Page,並設定為「搶先看」: https://fb.com/appledailyland

empty
鴻師傅的暗然銷魂叉燒蛋飯。($58)
empty
相比之下,牛油粟米蔬菜豬骨湯底 ($85),味道吸引得多。
empty
旺角煮場在T.O.P地庫,有6間食肆。
empty
我很愛吃刈包,但吃不慣小巷咖啡有骨的瘦叉夾包($38),應該是我不懂吃吧。
empty
從前的工業貿易署已變身成旺角新商場。
empty
「蓮香」的魚香茄子飯($48)配川貝杏汁白肺湯(加$28)。
empty
單點豬肺湯頗貴($48),但就好好飲,無味精。
empty
味噌叉燒拉麵 ($87)
empty
Popeyes炸雞真的很夠肉汁,完勝競爭對手。
empty
Khaosoi House的清邁咖喱牛肉湯麵 $58,炸麵脆、椰奶香、牛又腍,湯麵又很醒神。