「特金會」早前未落實日期之際，一班民主黨老鬼都囉囉攣，唔係擔心世界突然因為兩個狂人舉動有突變，而係創黨主席李柱銘娶新抱，馬丁囝囝李祖詒喺新加坡擺喜酒日子，前後撞正「特金會」，擔心若撞到正喺全城戒備下，出入好唔方便，結果「特金會」早於祖詒擺酒日舉行，飛晒去新加坡嘅老鬼一天光晒，楊森、何俊仁、李永達、單仲偕、涂謹申等都帶埋另一半出席，呢兩日玩得非常愉快；久未露面嘅李鵬飛都有到場，祝賀李柱銘升呢做老爺。

嗱，唔好覺得呢班老鬼杞人憂天，因為祖詒擺酒地方，正正係「特金會」嘅舉行地點，即係聖淘沙島嘅嘉佩樂酒店（Capella Hotel），都咪話唔橋！難怪李永達到步後都喺酒店外同何俊仁留影，並喺facebook貼相抽水話「特金會」仲有問題未解決，「唯有邀請我同何俊仁繼續開會處理下，Haha。」