韓國天團BIGBANG早前成為港台人氣手機遊戲《神魔之塔》嘅代言人，之前佢哋其中三位成員G-DRAGON(GD)、太陽同勝利都有嚟香港宣傳，而BIGBANG早前亦為《神魔之塔》拍攝新一輯宣傳照，不過今次佢哋就冇化身成遊戲角色，反而着上代表自己嘅顏色服飾，而且今次造型身為潮流指標嘅GD，都畀咗唔少意見，GD話：「上次嘅廣告嘗試咗超現實嘅概念，將我哋五子帶進神魔世界中。今次就回歸現實，以玩家嘅身份同大家見面，帶出挑戰自我嘅感覺。」

GD仲自爆近日密密打機練習，希望有機會可以同粉絲對戰。至於上次冇嚟香港嘅T.O.P，亦踢爆勝利同太陽平日一有時間就打機，取笑佢哋做代言人做得相當稱職。

BIGBANG所屬嘅YG事務所，早前是非多多，而YG事務所社長楊賢碩，近日上咗節目《HealingCamp》做訪問，佢仲被追問有關旗下藝人勝利、2NE1嘅朴春等屢次傳出車禍、吸毒等負面新聞，不過個節目未播出，睇預告見佢被追問時，個樣都幾尷尬，相信佢會係節目中親自解畫。

至於身為YG勁敵嘅SM事務所，佢哋旗下藝人都粒粒勁人，好似少女時代、EXO、SuperJunior等，今日就有消息話內地嘅阿里巴巴，將注資1000億韓圜(約5.6億人民幣)入股SM，並將成為SM第二大股東，不過佢哋兩邊都否認其事，而SM就承認現時同內地多個企業、公司傾談緊合作關係。