當年今日
關於我們

周日食話題:
鮑魚海參 滋補春茗 八百蚊有找

蘋果日報 2002/02/17 00:00


雖然話經濟唔多好,但新正頭,身為老闆嘅你,開工利是春茗等指定動作又點少得,最多利是封少啲,春茗食慳啲!今次介紹呢款健康養生套餐,畀幾百蚊就食到鮑魚、海參、花膠、瑤柱,菜式由專人設計,碟碟有「營」有款,既合乎OL瘦身要求,亦乎合慳錢大計啦!

記者:黃婉冰
攝影:謝耀恆
健康養生春茗菜單
~富貴三元雞~
~雞茸雪蛤羹~
~碧綠素八仙~
~瑤柱扒野菜~
~鮑魚小炒皇~
~海參扣鵝掌~
~花膠扒百靈菇~
~青檸汁焗鱔~
~田園野米炒飯~
$738
以上套餐為八人分量,餐廳可因應顧客要求增加分量。另需加一服務費。
碧綠素八仙
年三十晚開始日日大魚大肉,係時候素一素,這味碧綠素八仙,八仙即蘑菇、秀珍菇、雞髀菇、冬菇、金針菇及其他共八種不同的菇菌,用上湯燴熟,扒菜清淡得來選擇較豐富,最緊要係菇菌有降低膽固醇、補血作用,實行將膽固醇一筆OUT消。

試味報告:八種菇菌有八種味道同咬感,素而不寡,其中的雞髀菇和金針菇亦比較特別,口感爽脆而且味道清甜,滲滿上湯味道,將菇的鮮甜味提升。
富貴三元雞(半隻)
三元雞是三元樓的招牌菜之一,店內所用的雞種全由自己飼養,特點是皮薄脂肪少,用十一種不同藥材和香料做湯汁浸製半個鐘,中藥加上雞肉本身帶溫和,有溫中健脾益氣養血的功效。禽流感都無有怕!

試味報告:雖然有藥材成分,但雞肉無藥材味道,香滑味道頗特別,唔似普通白切雞,入味得來雞肉依然嫩滑唔會嚡。
海參扣鵝掌
正所謂鮑參翅肚,有鮑魚又點會無海參,海參無膽固醇成分,兼有潤燥補血作用,對老人家尤其有益,但海參本身無味,所以加入鵝掌平衡味道。海參同鵝掌會先以慢火燜燴至腍身,材料再用上湯煮,令上湯味道融入材料內,成碟一味夠「營」。

試味報告:海參扣鵝掌成日食,但係唔知原來咁有營養,海參燜得恰到好處,唔會一挾即散,鵝掌亦唔會過於漿口。
瑤柱扒野菜
老闆唔單止養雞,連菜都由自己包辦,但此菜並非普通菜,而是有降血壓及補血作用的野菜,為使口感味道無咁單調,所以特選多種不同口感味道的野菜混合,紫貝菜、白貝菜、馬蘭菜、人參菜、菊花腦,甘香爽口滑口,各有特色,配以可養腎的瑤柱,愈食愈健康。

試味報告:野菜味道無普通菜咁甜,但口感都頗特別,雖說是野菜,但食落唔會有渣,有瑤柱吊一吊味,味道總算冇咁寡。
鮑魚小炒皇
名副其實用乾鮑切粒,再加紅蘿蔔粒、芹菜、冬菇、雞肉、崧子、蝦米等多種材料清炒,食時用生菜塊包住,餡料比傳統生菜包豐富,是老闆娘自己食完取得靈感改良而成,就算係清炒,但油的分量都會偏少。

試味報告:餡料樣樣有,蝦米、鮑魚粒鹹鹹哋,夠香夠惹味,崧子鬆脆,入口有得𡁻,加入雞肉粒,令內餡無咁寡,起碼有番少少肉咬吓。
花膠扒百靈菇
原隻有手掌般大的百靈菇,是菌類中較罕有的一種,當造期在冬天。新鮮的百靈菇,身價較貴且溫中健胃,花膠的膠質可以幫助人體內的纖維組織,同樣對胃病有效益,輕輕用蠔油燴過吊一吊味,但依然保留材料本身的味道。

試味報告:百靈菇口感得意,入口滑嘟嘟,咬落有彈性得來又有少少煙韌,味道帶鮮甜,同腍滑的花膠剛好相反,兩種口感各有不同。
店名:三元樓
電話:31522139
地址:紅磡黃埔花園第八期蔡瀾美食坊1樓106及107號舖
座位:120個
營業時間:中午12時至下午4時半,下午5時至午夜12時。
付款方法:現金及信用卡(Visa,Master,JCB)