當年今日
關於我們

【李八方online】立會取消周三大會免聚眾 譚文豪WFH忙打電話助滯留秘魯港人

蘋果日報 2020/03/30 12:55

立法會武漢李八方ONLINE譚文豪在家工作武漢肺炎WFH

武漢肺炎下,聚眾好高風險,立法會立法會主席梁君彥都宣佈,經過同議員代表商討後,考慮到大量人士喺立法會大樓執行職務或者逗留聚集會增加病毒傳播嘅風險,所以本周三﹙4月1日﹚唔會舉行立法會大會。同日嘅工務小組會議亦取消,至今立會本周只餘周五嘅衞生事務委員會同財務委員會特別會議未宣佈取消。突然冇乜會開,民主派議員WFH,依然好鬼忙。

積極協助滯留秘魯港人嘅公民黨譚文豪忙於打電話同傳電郵畀唔同國家領事館,希望協助港人盡快回港。佢話由於時差關係,好多時勁夜都要繼續跟進,但強調巿民投得票畀佢,都要好好利用議員身份幫人。噚日公開鬧爆特區政府「佛系」救援後,佢話入境處至今仍未向滯留秘魯嘅港人講到,幾時先可以協助佢哋返港?反之英國政府今日已經派包機到秘魯協助當地公民撤離,所以呼籲喺秘魯有BNO嘅港人盡快同當地英國領事館聯絡,希望爭取上到包機離開秘魯。

民主黨許智峯話見到唔少巿民同食肆都覺得禁止4人以上聚集嘅規例唔清唔楚,原本諗住喺立法會大會跟進,但相信有關討論都要押後。問及早前因為夾錢保釋被警方以古法「煽動意圖罪」拘捕嘅鄭麗琼,慘遭民建聯陳學鋒老屈收錢示威,許透露今日下晝會同律師開會,相信日內會草擬好控告陳學鋒誹謗嘅入稟狀。至於陳學鋒被網民質疑發佈假消息仍死撐唔覺失實,許批評陳相當無賴,斥對方完全無求證、亦無問過佢回應就老屈,「﹙陳﹚既然咁無賴,就要承受返個惡果」。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架