上星期萬人Big爆立法會，1月圍城停不了，反高鐵抗爭嘉年華聽日又嚟嘞，一連幾日嘅集會聽日開始，參與人數隨時破上星期紀錄，為咗令所有參加集會人士都可以睇到財委會開會情況，反高鐵停撥款大聯盟一於搞大佢，要求立法會提供電力同協助轉播會議，可惜幾項要求都俾秘書處拒絕。
立法會秘書長吳文華噚日解釋，要在立法會外皇后像廣場、遮打花園直播財委會會議，既有技術、安全問題，亦涉及電視台訊號版權問題，有難度；提供電力亦唔方便，因為立法會用公帑交電費，供電畀民間集會可能唔啱規矩，要議員開會通過先得，唔係幾日可以拍板嘅事，秘書處唯一可以做到嘅事，係即時增加伺服器容量，令網上即時收聽會議過程嘅上限由250人增至350人，如技術許可，上限或可達到1,000人。

文化營200人報名

大聯盟成員葉寶琳則指，市民有權監察議會運作，因此立法會容許市民旁聽，家陣只係因為議事廳唔夠位坐，市民先至要在外面集會，所以立法會有責任支援集會。未來幾日抗爭嘉年華節目豐富，菜園村高春香會現身保家園，陳巧文、黃衍仁分別苦行同斷食，當然唔少得保衞過天星嘅朱凱迪。葉寶琳又話，已有約200人報名參加反高鐵文化營，估計有幾十人至100人聽日入營，喺立法會外露營。

大聯盟自備發電機

幾十個營幕喺中環排開，令人想起20年前廣場上嘅情況，鄭人大唔知會唔會震驚到又嗌出兵？由於預計今次更多市民參加集會，大聯盟已搵製作公司幫忙佈置場地燈光、音響，連發電機都自備，所以唔怕立法會唔肯供電。葉寶琳同八方講，會豎起一個10呎高螢幕，透過互聯網直播財委會情況，同時喺立法會外擺幾個較小螢幕，希望所有集會人士都睇到。
上次集會音響、燈光等費用要幾萬蚊，葉寶琳稱今次規模更大，支出可能達到六位數字，唔係小數目嚟o架。
mailto:[email protected]