韓劇《WhoAreYou-學校2015》男星南柱赫今日下晝將於上水廣場舉行粉絲見面會，佢今朝就先由韓國飛嚟香港做準備，吸引過百粉絲去機場接機，現場亦有5至6名保安嚴陣以待。

大約中午12時20分，身穿白衫嘅南柱赫於A閘現身，大批粉絲即時衝前圍住佢，令南柱赫一行人完全行唔到，而南柱赫就一直低頭，亦冇露出笑容。

南柱赫由接機大堂行去停車場時，本來1分鐘嘅路程佢就行咗6分鐘。一路上南柱赫一行人都被粉絲圍到實一實，多次被迫停低，保安就不停大叫「行前少少唔該」、「行啦」等。

由於現場太混亂，有粉絲多次跌倒，亦有女粉絲於南柱赫面前跌底，去到停車場前，由於粉絲多到迫實門口，後排人差啲推倒一排手推車，場面失控。而南柱赫上車後，亦有粉絲上追星車照跟。