當年今日

股市身歷聲:TCL大戶集齊子彈

蘋果日報 2003/05/25 00:00


個市沉靜咗一段時間後,上周班炒家終於又再蒲頭,更勁炒一眾落後工業股。之前由兩蚊跌至個四樓下嘅TCL(1070),基本上早前俾人唱盤數唔乾淨嘅負面因素,都已經消化得乾乾淨淨,喺低位徘徊咗個多禮拜之後,終於唔聲唔聲咁喺上星期突破之前嘅下跌走勢,上周四升穿50日平均線之後,個勢變得更加靚。有行家即刻同伏勝講,話炒開TCL嗰班大戶喺上星期已經埋位,重已經集齊子彈,話隨時會嚟個大反轉。
聽講今次要炒起TCL嘅原因,唔單止技術走勢靚咁簡單,重係同佢本業有起色好有關係,聞說好快會有啲正料爆。
威倫堡幕後飄忽
睇番TCL嘅走勢,喺上星期四同星期五兩日都有好多一球一球嘅買盤入市,雖然隻股今非昔比,個市重係唔明朗,升勢可能冇以前咁勁,不過要升至接近個八樓上並唔係難事,如果各位有耐性,要升返去兩蚊其實都唔係無可能。
另一隻有機會炒高但無乜概念嘅股仔威倫堡(8020)喺一毫子左右升上嚟之後,上星期突然停咗喺度,上星期五更稍為回落番去0.167元收市,不過個價仍然企喺10日線樓上,走勢都叫做企得幾穩。
有行家話,呢隻股仔唔係好多街貨,要炒上其實唔係好難,問題係隻股升到去呢啲水位,仍然唔係好多其他「友好」入市,結果個價升上嚟之後,成交額就細咗好多。聽聞班大戶由於手持嘅股份未能易手,暫時要繼續同佢哋生死與共,有行家更話,隻股仔要去到兩毫樓上,先可能吸引到另一批「友好」出嚟買貨,不過隻股嘅買家一向行蹤飄忽,所以即使係有膽色之士,都唔好太過搏命。
伏勝