「十優港姐」麥明詩（Louisa）讀書叻之外，原來當年仲上過「太空」！話說美國萬通主辦嘅小太空人訓練計劃踏入第20周年，今屆特別喺四季酒店設午宴，邀請10位年齡介乎7至11歲「成功登月」嘅小太空人同爸媽、校長老師，一齊食餐飯，慶祝完成美國9天「太空探索之旅」。麥明詩就以大師姐身份，同小太空人傾吓偈，兼唱歌表演。

事業剛起步話想結婚

Louisa唱咗「我的驕傲」呢首歌，寓意每位小太空人「不怕氣壓搖擺」，勇於面對挑戰咁話。之後佢同一班小太空人喺台上清談，問題都幾尖銳㗎，好似問Louisa家陣有乜人生目標，攞好成績有乜秘笈。
Louisa事業剛起步，竟然話最想結婚，不過笑笑口話家陣未有可能做到；至於成功秘笈，主要取決於心態，最重要「唔好當任何失敗係一個失敗」唔好放棄，繼續嘗試。
雖然個計劃唔係真係上太空，不過小太空人可以去到美國嘅太空訓練營接受多項具挑戰性嘅模擬太空人訓練，仲可以同資深太空人見面傾偈。要入選亦唔簡單，過千名小朋友參加，只得10個位，有家長分享話要過三關，整作品、入camp訓練，最後先係評判面試。評判之一嘅車淑梅喺台上大爆，「由小朋友行入嚟嘅第一秒已經計緊分㗎喇！」今時今日，做小朋友真係唔簡單。

李華華
mailto:[email protected]