政壇有兩個人，一去維園，勢必令維園阿伯腎上腺素急升，心跳加速，一個係民主之父李柱銘，一個係長毛梁國雄。長毛噚日去咗維園，成班維園阿伯紮馬「迎賓」，不斷高喊長毛係漢奸走狗，喺立法會搞搞震等十年如一日嘅形容詞，長毛完咗之後同主持謝志峰講，唔介意俾維園阿伯鬧兩句，但好驚班維園阿伯會激到當場中風。

便衣警察護送下離開

長毛噚日一到場，成班維園阿伯罵不停口，一到廣告時間，成班維園阿伯起哄，長毛不斷話唔怕佢哋，叫阿伯放馬過來，「你係咪擲雞蛋㗎？係就快啲擲。老而不！你哋唔係反英抗暴？唔係擲炸彈嘅咩？」謝志峰話，邊個擲嘢，佢會即時報警。
節目完咗之後，成班維園阿伯連長毛娘親都問候埋，令長毛火起，現場四、五個便衣警察護送長毛離開。長毛同謝志峰講，自己俾人鬧兩句冇所謂，但班阿伯唔應該攻擊埋佢媽媽，又話擔心維園阿伯有日會激氣到當場中風。謝志峰話，自己都擔心會被激親，試過自己母親都俾班維園阿伯問候過，好激氣咁話。早排受嚴重腳傷嘅長毛話，周六代表立法會踢波，但草地太軟，搞到舊患復發，返到屋企要敷冰。