每次講起白花油（239），除咗諗到嗰陣藥油味，當然仲有太子爺「白花油王子」顏福偉。唔講唔知，原來顏福偉有位幾靚仔嘅姪孫顏清輝，喺公司做咗9年，舊年升埋做上市公司執董，佢兩位以後可以一齊做白花油代言人喇。
顏清輝今年35歲，早年畢業於英國倫敦Royal Holloway University，取得管理學士學位。佢爸爸係69歲嘅白花油主席顏為善。雖然顏為善年紀大，但輩份細過54歲嘅顏福偉，係顏福偉個姪，顏清輝係佢姪孫。媽呀，係咪好亂呢？

90周年未知會否出新歌

Anyway，既然有位外形唔錯嘅姪孫，當然要公諸同好喇。顏福偉噚日就趁股東會，向傳媒介紹佢，不過呢位姪孫似乎好怕醜，冇乜兩句，希望下次表現好啲，輕鬆啲啦！
講番顏福偉，相信大家對佢首《愛多八十年》唔會陌生，適逢明年係品牌90周年，佢又會唔會再開金口，幫白花油唱番首主題曲呢？
顏福偉就話，近兩年都有推出新歌，不過唔係幫公司宣傳箒，至於明年會否整首白花油金曲，佢話要度度先。佢不妨考慮同顏清輝嚟個crossover吖，有睇頭，又可以慳番筆代言人費用。

李華華
mailto:[email protected]