效力法甲巴黎聖日耳門嘅巴西球星尼馬，感情生活一向多姿多彩，點估到連佢阿媽高嘉妮芙亦都好識揀。美國傳媒報道，52歲嘅高嘉妮芙周日喺ig公開新戀情，對象居然係一位22歲嘅小鮮肉泰亞高拉莫斯，男友足足比阿仔尼馬仲要細六年！

52歲嘅高嘉妮芙喺2016年同尼馬嘅爸爸離婚，等足四年終於遇到新嘅人生伴侶。佢喺ig貼出同22歲拉莫斯嘅合照，二人深情對望，高嘉妮芙仲將隻手放喺男友嘅頸上；而拉莫斯亦都有喺個人ig分享同一張相，睇嚟兩個人嘅感情唔錯。報道話，拉莫斯係一位模特兒，睇佢ig身形健碩又幾靚仔，年齡就比尼馬細六年。作為阿仔，尼馬亦都大方祝福媽媽搵到真愛，佢留言話：「要幸福快樂呀媽媽，愛你。」

據講拉莫斯係尼馬嘅忠實fans，17年佢就曾經表示：「尼馬你真係冇得頂，能夠成為你嘅球迷，我真係唔知道點形容呢個情緒。睇住你比賽，我覺得好有動力，希望有一日我可以識到你，能夠做到你嘅兄弟，大家一齊比賽一齊玩。」結果佢今年一月就成功搵到尼馬集郵，二月更加做咗好朋友，仲去埋尼馬嘅28歲生日派對。斷估佢唔會為咗追星，同尼馬阿媽一齊啩？