【新增回應】

李蘊於前年大住個肚嫁俾生意人老公羅章冠，同年5月誕下囡囡羅紫晞，平日主力湊女顧家嘅佢，今晚喺Instagram貼相宣佈再度懷孕，相中有兩支驗孕棒，一支係屬於晞晞於2015年嗰陣嘅驗孕棒，今次多咗支新嘅，係2018年，李蘊留言話：「晞晞要做家姐啦！今年會有隻小狗黎到我哋屋企！好感恩！希望一切順順利利！大家身體健康！」

其實喺李蘊宣佈有喜之前，佢喺囡囡個Instagram貼咗張着住母女裝嘅相，雖然只係好普通嘅行街照，但有唔少眼利嘅網民已經睇得出李蘊有喜，仲留言問佢係咪再有咗。李蘊公佈喜訊後，有唔少人留言道賀，亦有人留言話李蘊個好姊妹、亦即晞晞契鄧紫棋（G.E.M.）將會再多一名契仔/契女。

《蘋果》聯絡到李蘊，佢話：「哈哈，多謝！（現有幾個月身孕？）4個月啦， 好開心，身體冇咩大反應，o依家食得瞓得。」問到晞晞知道做家姐有乜嘢反應？李蘊話：「囡囡知道之後日日都錫我個肚，好乖，知道自己要做家姐。」咁知到BB性別未？李蘊再話：「未知仔女，但仔女都係個天俾我，一樣咁開心。」對於佢再陀B，老公有乜嘢獎勵？李蘊話：「又冇咩特別獎勵喎，同平時差唔多，個人開心咗囉！」而佢嘅預產期係8月底。

真係恭喜晒呀！

精選娛聞，喺晒《娛果》
http://fb.com/appledailyent