近排樓市唔見得好旺，不過伙數近萬嘅鴨脷洲海怡半島，近日竟然出現買家搶貨，而且一連兩宗。
作為業主嘅，計過數可以袋多啲，自然肯賠定重售；對於代理嚟講，當係做多一單成交，佣金雙倍；至於買家，雖說蝕咗時間，不過賺番幾萬蚊定金，聽落都冇壞。唔怪得美記林潤強話，賠定重售成交，多多益善。
一單係三十三座低層D，逾六百六呎，成交價逾二百二萬，每呎近三千四，扣除賠定費用及佣金等，仍執多近八萬。另外，一座中層E，六百四呎，作價逾百八萬，每呎近二千八百六，業主袋多六萬。

住恒基樓長者唔怕悶
西灣河嘉亨灣會所係一大賣點，發展商恒基不厭其煩，分幾日推介，噚日輪到介紹「長者天地」，有園林茗茶角同茶藝間，設茶藝品茗班及書法班。
恒基趁機搵茶藝樂園品茗專家，同埋書法家，即席示範泡茶與書法，將來長者住客大把節目，唔悶。
長者天地日後安排舞蹈名家辦社交舞班，歌手袁鳳瑛、曾航生教長者唱歌。有見及此，恒基老臣子、營業部副總經理吳仲康即席獻唱，唱番隻「香港靚女多」，兼且示範標準舞口訣及步法，等大家睇吓將來住喺嘉亨灣嘅長者，都有佢咁犀利。