近幾個月港股成交又轉旺，唔少銀行大打減佣牌搶客，之前渣打（2888）、恒生（011）、大新（2356）同永亨（302）接連大搞「零佣」搶證券客戶，雖然中銀（2388）噚日使出佣金「八八折」輕輕力反攻，但都已經令一眾華資經紀行愁爆。

華資細行呻難撈

中銀嘅優惠期限由呢個星期一（7日）到2月底，特選客戶以自動化渠道買賣股票滿一定金額，八八折佣金優惠就會以回贈方式送出，上限1000蚊；如果特選客係第一次用自動化渠道買股，仲有多100蚊回贈，但相比其他銀行嘅零佣優惠，似乎就「削」咗啲。
查實近兩個月經紀界A組同B組嘅市場佔有率都有輕微回落迹象，銀行都加入埋劈佣族其實唔出奇。不過證券商協會主席蔡思聰就繼續鬧爆，話銀行同華資行嘅客路好接近，劈佣係以本傷人嘅行為，加上銀行龐大嘅平台，細經紀行根本冇得爭，「就算生意多咗，毛利都係賺少咗」，仲話華資業界最困難時刻仲未過𠻹，總之生意難做啦。