棄律師、轉行從事補習教師及演藝事業嘅林作，今日再度現身書展，佢話自己同媽咪食完飯後先嚟，仲話自己原本冇打算再到書展，只係有網民同佢講話想見吓面同攞簽名，所以佢先再現身。

提到本書喺同一出版嘅銷量排行第三，林作話要谷行上第一位，仲講明要搵阿媽幫手「灌水」，林作話：「（叫阿媽）嚟買幾千本返屋企包起佢，因為我哋成日要俾錢啲傳媒造新聞……講笑啫，純綷係為讀者而嚟。」佢仲話會預咗啲書送畀朋友，咁包唔包括麥明詩？林作話：「呢本書我會所有朋友都俾一本嘅，（麥明詩有冇份？）只要佢想要。」

平日言論出位嘅林作，喺接受訪問其間突然爆：「我強調，今日第一次嚟書展，我先發覺呢真係咩人都出書，呢一本嘢（林作本著作）真係有真材實料，唔係虛嘢，我可以話畀大家聽，係有幾個好朋友揭完本書之後嚇親，話呢本書原咁有內涵、咁貼地、咁實在，唔係話啲花臣寫真集。大家留意吓，成本嘢一張圖都冇，係特登嘅！我要向所有有圖片嘅書籍說不！有圖片嘅書，收皮！」

林作爆開有條路，佢繼續話：「所以喺200版嘅情況之下好實用，我字數比一般咁厚嘅書係多好多，所以係想話畀人聽，有實力嘅人應該咁樣出書。」咁係咪唔買寫真集先？林作即話：「嗰啲書我照買嘅，但係照鬧！書展唔應該有呢啲書籍出現，嗰啲應該叫做一個寫真展，我願意做統籌之一，日日喺度做o靚模寫真集嘅推介會。」

再問到拍AV嗰啲，林作聞言即話no comment，問佢今次買咗寫真集未？佢就話「暫時冇」。