側田一連兩場嘅《側田CHAPTER FREE世界巡迴演唱會2017 香港站》今晚喺紅館開鑼，嚟睇騷嘅包括林家棟、鄭俊弘、羅力威同女友雨僑、蘇永康、周汶錡以及方力申同爸爸等等。

演唱會今次開三面台，喺夜晚8點35分，側田喺升台出場唱咗第一首歌《我有今日》，見佢着住紅長褸連帽外套，佢戴咗頂外套帽之後遮住咗大半塊面。當側田唱完第一首歌之後再唱《好人》，而佢唱第二首歌嘅時候，就除咗紅色外套頂帽。不過原來佢帽中有帽，側田本身係戴咗頂黑色cap帽，即係出場笠兩頂帽，而頂黑帽有埋黑色布遮後尾枕，真係好保護佢個頭。而側田唱歌嘅時候都有行去觀眾席同觀眾握手。

之後側田話今晚唱咗3首歌就失聲唔知點算，佢話:「今晚重要唱30首歌，睇嚟要同大家大合唱，2年半冇喺香港開演唱會，每次喺香港開騷，就好似搞婚禮咁，因為好開心，可以見番好多好耐冇見嘅親朋戚友。」

更多娛聞，喺晒《娛果》
http://fb.com/appledailyent